我的義工路： 從時裝到獨木舟義工

Hello，大家好！識我嘅朋友都知道，我唔單止係個時裝設計師，仲係一個9歲女兒嘅媽媽。今日想同大家分享下我工作以外嘅生活，講講我做義工嘅經歷。

上星期，我參加咗 #中國香港獨木舟總會展能組 嘅義工活動，幫 #樂智協會 嘅年輕人學獨木舟，準備參加比賽。呢個活動已經係我第二年參加，唔好以為義工只係站岸邊指揮，我哋係真係要「落水」教嘅。我主要嘅工作就係陪住一班有智力障礙嘅年青人，手把手教佢哋划獨木舟。

老實講，對我嚟講真係一個大挑戰，因為其實我以前係好怕水嘅。以前去沙灘，我最多就係曬日光浴，或者帶女兒去玩下水咁。但因為呢個義工活動，我「高齡」之下決定學游水，仲考咗獨木舟星章資格，為嘅就係可以真真正正幫到呢班年輕人。

點解我會咁做？其實全部都係因為一份感動。唔只係感動，而係「好！鬼！感！動！」

緣起

回想起兩年前，我嘅另一半分享佢做義工嘅經歷，我覺得好有意思，但始終都唔明白點解佢會咁投入響呢件事上面，每個星期日都要早出晚歸，於是，不明所以嘅我俾佢邀請去「望吓」。起初，我諗住做義工都係普遍照顧吓人、傾卟偈果啲刻板印象喇。殊不知，第一日去到，我就要幫參加者搬艇，仲要落埋水！但呢次落水，改變咗我之後嘅睇法。

教練嘅投入

首先，真係好感動嘅係嗰班義務教練。佢哋本身都有正職，有啲係老師、有啲係社工，仲有啲係商界工作嘅人。但唔論多忙，佢哋都會喺工餘時間自願嚟教呢班年輕人，真係好用心。有啲學員特別驚水，教練會將學習變成遊戲，令學員喺玩樂中慢慢學會技巧。每次見到學員成功完成動作，之後同教練擊掌嘅時候，嗰種喜悅同成就感真係好難形容，完全係心入面暖晒。

家長嘅支持

每次練習，一班家長都會喺岸邊支持住自己嘅仔女。有一次，我同一位家長一齊睇住佢個仔成功划過一段好長嘅距離。嗰位媽媽眼泛淚光，感激我哋幫咗佢哋。佢話，佢從來冇諗過有一日可以見到自己個仔咁自由自在咁划獨木舟，因為佢個仔從細協調能力比較弱，平時生活都需要好多幫助。作為媽媽，我完全理解佢嗰種感受，當時我都忍唔住眼濕濕。呢一刻，我真係深深感受到家長無條件嘅愛，正正係呢份愛，推動住佢哋嘅子女一步一步成長。

學員嘅堅持

呢班年輕人，每個人都有唔同程度嘅智力障礙，但佢哋嘅堅持真係好打動我。有幾次，我聽到學員同我講：「芳芳姐姐，我一定可以學識嘅，我好開心呀！」對普通人嚟講，可能一個簡單嘅動作一個鐘內就學識，但對呢班年輕人嚟講，可能要用幾倍時間同精力。不過，佢哋從來冇放棄，仲成日掛住笑容，嗰種堅持同滿足，真係令人好感動。

經過呢次義工經歷，我深深感受到，一個人嘅力量可能好細，但當大家一齊努力嘅時候，就可以帶來好大嘅改變。我希望呢份感動可以傳遞俾大家，正如嗰句老話：「勿以善小而不為」，希望大家都可以喺平凡嘅生活中，找到屬於自己嘅善意，並且將呢份善意傳遞出去。